Bitcoin e Ethereum bien pas paralajmërimit të Fed-it

Bitcoin, Ethereum bien pasi kryetari i Fed-it sinjalizon se ulja e normës për 25 pikë mundet me qenë e fundit për 2025-ën
Nga BEN WEISS
Gazetar për Kriptovaluta

Tregjet e kriptos ranë pak të mërkurën pasi Jerome Powell, kryetari i Rezervës Federale të SHBA-së, dha me kuptu se ulja e normës së interesit në tetor për 25 pikë mundet me qenë e fundit për vitin 2025.
Sipas të dhënave prej Binance, Bitcoin ka ra 1.6% në 24 orët e fundit, duke u tregtu n’afërsi të $111,000. Ethereum, kriptovaluta e dytë më e madhe për nga kapitalizimi i tregut, ka ra rreth 2% në mbi $3,900. Kapitalizimi total i krejt tregut të kriptovalutave ka ra 1.8%.

Edhe pse Powell tha që ka “mendime shumë të ndryshme” mes kolegëve të tij për uljet e ardhshme të normave, ai shtoi në konferencë për media se “po shtohet ndjenja që ndoshta tash është momenti me pritë një cikël para se me vepru prapë.”

Indeksi S&P 500 përfundoi ditën pothuajse pa ndryshim, Dow Jones ra rreth 0.2%, ndërsa Nasdaq u ngrit gati 0.6%.

Përkundër lëkundjeve në tregje, disa analistë të kriptos ishin disi optimistë.
“Lehtësimi i kushteve monetare e përkrah lëvizjen e çmimit të Bitcoin përpjetë, për sa kohë që pamja makroekonomike s’paraqet ndonjë problem serioz që tregu s’e ka pa ardhjen,” ka thënë në një email për Fortune, Alex Blume, themelues dhe CEO i kompanisë për menaxhim të aseteve kripto, Two Prime.

Rënia e çmimeve të kriptovalutave të mërkurën ishte shumë më e vogël krahasu me “flash crash”-in e 10 tetorit, që zhduki mbi $19 miliardë pozicione në ngjarjen më të madhe të likuidimit të kriptos që është regjistru ndonjëherë, sipas firmës analitike CoinGlass.

Ajo rënie ndodhi në të njëjtën kohë me kërcënimin e presidentit Donald Trump për me vendosë tarifë 100% ndaj Kinës “mbi e përmbi” ato ekzistuese, çka e bëri Bitcoin me humbë mbi $200 milionë në kapitalizim tregu dhe me ra gati 10% në çmim. Ethereum pësoi edhe më keq, duke ra pothuajse 14%.

Vetëm disa ditë pas atij “flash crash”-i, Trump e zbuti retorikën e tij. “Mos u brengosni për Kinën, gjithçka ka me qenë në rregull!” ka shkru në Truth Social. “SHBA-ja don me ndihmu Kinën, jo me e lëndu!!!”

Që prej asaj kohe, tregjet—përfshirë edhe çmimet e kriptovalutave—janë stabilizu, dhe tregtarët po presin me padurim rezultatin e takimit të së enjtes mes Trump dhe Xi Jinping, presidentit të Kinës. Prej 10 tetorit, Bitcoin po tregtohet rreth $110,000 dhe Ethereum po sillet afër $4,000.

“Pamja makroekonomike që po ndryshon është faktori kryesor që po e shtyn këtë cikël të kriptos,” ka thënë në një email për Fortune Thomas Perfumo, ekonomist global në bursën e kriptos Kraken, duke shtuar se: “Edhe pse tregu po stabilizohet pas ngjarjes së likuidimit më 10 tetor, ky ‘reset’ e ka zvogëlu ndjeshëm tolerancën ndaj rrezikut në afat të shkurtë.”